بونجـــورنوا
Buon Giorno
مطبخنا اليوم تآاليـــانو،،
سباقيتي ويـــذ مييت بولز
Spaghetti with meatballs
الصغار حيـــحبوهآ بالتأكيد ،، وهي من مفظلات راجلي ربي يحفظهولي
اليوم ماعنديــــش مقادير معينة انرتبهالكم لكن اندير فيها بعيني،،
ناخد مفروم مغسول وجاف مايكـــونش فيه مية،،يعني بعد تغسليه خليه اينزل ميته كويييس،،
شوية ثوم(ماعندناش فيها بصل)
شوية حبق مقطع
ملح
خبزة مرحية
بارميزان شوية
فلفل احمر
اوريقانو( الاوريقانو أوراق الزعتر مجففة)تلقوها في المحلات
او ممكن تستعيضي عنها بالزعتر اللي عندكـ
نعجنهم مع بعض وانتبــهي اتحطي شوية من الخبزة وزيدي بعدين يالشوية ، لأن عجينتنا نبوها رطبة شوية،،
كركبيها وخودي مقدار متساوي كل مرة باش ايجوكـ الكراكيب زي بعض،، ممكن تستعيني بــاكواب القياس ولا كاشيكـ الجيلاطي ،، عرفتوه!! :)
ولما اتكركبيها ماتضغطيش عليها ،، لازم ايكون فيها شوية فراغ من الداخل
>كان فهمتوا قصدي!!<
هما هادوآ الكـــراكيب
نحطوا طاجين عالنار وشوية زيت زيتون
لما يسخن الزيت حطي كرات اللحم
وقلبيهم بالشــوية لين ياخدوا لون
هني خدوآ اللون
ضيفيـــلهم الصلصة متاعكـ انا استعملت النوع هادا ممتازبالحبق وهو البطل في الأكلة هادي بـ3 ونص لكن مش خسارة فيها،،
زيديها ملح وشوية ثوم تاني
وانتبهي للملح الموجود في الصلصة نفسها باش اتوازني،،
وأوريقانو تاني
وكاشيكـ طماطم حكة
وشوية ســكر باش ايعدل حموضة الطماطم،،
وقلبيها بهدوء ومرري الكاشيكـ بين الكرات من غير ماتمسيهم واتسببي انهم يتفتفتوا
زيديها شوية زيت باش ايحل الطماطم اللي فيها
و
خليها تتسبكـ على نار هادية جدا حوالي ساعة الا ربع ،،
في طنجرة حطي ميـــة تغلي،،
حطي أعواد السباقيتي حطيتهم على طولهم
استعملت سباقيتي ســـمراء بالقمح الكامل ،، اسمها MISURA
بـ 1:75 رخيصة وبديل صحي افضل،،
حطي في المية شوية ملح وزيت
(عندكـ علم انكـ لو اتحطي ميــــة كافية يعني تغمر المكرونة مش حتستحقي لزيت فيها!!!)
،،المهم انخلوها 8 ميـــنتز زي مامكتوب عالباكو
وتصفى بعدها
حطيلها شوية زيت باش ماتلصـــقش في بعض
نبدوآ انحطوها في صحن التقديـــم،،
حي عليكم البرمــة هادي متاع شيف ،، مش اي حد ايديرها :P
انضيفوا من الصلصة وكرات اللحم،،خودي من الصلصة قبل بعدين حطي الكرات
وشوية جبنة (لوعندكـ بارميزان افضل)
ورشة حبق
وترررارررا
هادي حصتي مانبيش انصور قعـــد راجلي،،
:P
وبالصحة عليكم
0 التعليقات:
إرسال تعليق