كيف حال الحلوين!
:)
نبدة عن شركة آيف روشيه YVES ROCHER
إيف روشـــيه شركة فرنسية تخدم منذ أكثر من 50 سنة ، تأسست في 1959 من رؤية رجل أعمال آسمه "إيف روشيه" وكان مبداه هو صناعة مواد التجميل من النباتات " مش من مصدر حيواني يعني"،، وكان تخصصه في منتجات العناية اليومية والمكياج والشعر والعطور وخلافه.
نبي انبه على حاجة كون الشـــركة تعتمد مصدرها من النباتات هاذا لايعني ان كل منتجاتها عضوية ،، لازم ننتبهوآ للفرق.
أنا نقطة ضعفي الحاجات هادي،، ممكن انبيع "َذهَبَاتِي" على خاطرهم :p
المحل موجود في السياحيـــة جنب PROMOD ،حي الأندلس وفي بن عاشور ، شارع دبي في بنغازي
جولتي في المـــحل كانت على ثلاث مرات،، المرة الأولى في وقت التخفيضات ،وبعدين رجعت في نفس اليوم لاني ماخديتش ديودرانت..
وبعده بأسبوع رجعت تاني وكانت التخفيضات تمت ومدايرين عرض مستمر للآن " اللي تشري بـــ100 دينار تحصل خصم 20 \ واللي تشري بــ200 دينار تحصل خصم تقريبا 40 دينار مش متاكدة من الرقم،،
أسعاره غالية بالنـــسبة للعبوة ، لكنه يستحق التجربة وماتستخصريش في نفسكـ حاجة من ناحية العناية والاهتمام.
الأسعار تلخبطت فيهم شوية خصوصا اني اعتمدت على الفاتورة واكتشفت انها حبرها مختفي ومش واضحة ، وترددي على المحل لخبطتني شوية فاعذروني لو غلطت في رقم او ماعرفتش اسعار بعض الحاجات.
لو اتجي تفتحــي الموقع متاع الأنترنت متاعهم تلقي عندهم منتجات مش متوفرة في محل ليبيا، بالذات مجموعة الــ"Bio" وهي افضل مجموعة نزلها بالنسبة ليا،، تلقيها عليها العلامة هادي.
اليوم بنعرضـــلكم مشترياتي لكن ماكونتش فكرة واضحة عنها من خلال التجربة، فمش حنقولكم رأي فيها لين انجربها.
في جولتي الأولى خديت مجموعة الحمام المغربي
Yves Rocher TRADITION DE HAMMAMl
المجموعة حلوة ، لكن لقيتــها ناقصة وخديت منها واحد ايجي كــ "ست " كامل،،
فيه shower oil + scrub على شكل توبيتو + Balm مرطب قوي شوية.
الباكو كلفني 22 دينار ليبي
زدت معاه مقشــر وماسكـ الطين اللي هو المفروض ايجي هكي
هادا الماســـكـ ،،للوجه والشعر
المجموعة كاملة حنتكلم عليها بالتفصيل في تدوينة قادمة ان شالله.
مجموعة الحمض النووي النباتي المبيض
ADN VEGETAL WHITE
تفتح البشــرة وتوحد لونها بنبتة " العرق سوس" ، الافوليا ، بذرة القمح
حصلت منها المجموعة هادي المنظف
PURIFYING FOAM CLEANSER
على أساس اينحي الجلد الميت ويجدد البشرة وعند الغسل إيدير رغوة ، هو "لايدير في رغوة ولا شي" مع انه فيه مادة
الصوديوم لاورا سولفات sodium laureth sulfate
وهي المسؤولة عن عمل الرغوة،، وفيه "الستريكـ اسيد" اللي هو حمض الليمون ونسبة بسيطة من المواد الطبيعية اللي ذكروها،،
انا شخصياً التبييض لايستهويني ، اخدتهم للتجربة على خاطر البنات اللي سألوني على التبييض ،، مهم ايكون لون بشــرتكـ متجانس وخالي من العيوب أفضل ماتكوني
" بيضاء".
بالأضافة ليه مخاطر وهادي قصة طويلة تبي شرح في تدوينة منفصلة،،
المنظف " الرغوي" هادا بــ 29 دينار
عناية اليدين للترطيب والتبييض
HAND CARE-MOISTURIZING WHITENING
اتحطي منه في ظهر يدكـ ودلكي
لحد توا نتائجه مش ولابد،،نعطوه فرصة شوية.
25 دينار
مجموعة الشور
بودي لوشن ORGANIC OATS SILKY LOTION
بخلاصة الشوفان عضوي يعني تدخل المواد الطبيعية في أغلب مكوناته
للترطيب العادي
السعر سامحوني والله مانتفكر
ORGANIC VANILLA
SILKY LOTION
لوشن حريري بالمواد العضوية والفانيليا
17 دينار
ORGANIC VANILLE BODY EXFOLIANT
بدون تخفيض سعره 35 دينار
ORGANIC VANILLE SILKY CREAM
مرطب بس مركز اكثر بعد التقشير
35 دينار
المفروض ناخد مع المجموعة SHOWER CREAM لأن بشرتي جافة لكن انا ماخديتش لانه عندي في الحوش من ماركات تانية ويالله انكملهم.
الشامبو
خديت NUTRI-REPAIR TREATMENT SHAMPOO
للشعر الجاف والمتطاير.
في شعرة حرشة من طبيعتها ،،لكن الشعرة الجافة ممكن اتكون ناعمة لكن جافة من الصبغة والسشوار وغيره.
يحتوي على نبتة الجوجوبا واللي مسؤولة عن الترطيب
مكتوب عليه "خالي من السيليكون" اللي مسؤول عن اعطاء الشعر كثافة.
كلنا نحسابوا الشامبو اللي يعطينا كثافة بعد الغسل هو الاحسن بينما هو يحتوي على مادة ضارة جدا بالجسم وتسبب ضرر للشعر على مدى بعيد.
الشامبو"خالي من مادة البارابين"
مافيشي ملونات
لكن الاخطر واللي غفلوا عنه الشركة انه فيه مادة
"الصوديوم لاورا سولفات"
واللي هي مادة ضارة وتسبب في تساقط الشعر.
من الصعب نلقى منتجات في ليبيا خالية من المواد هادي، بينما لما اتسافري تلقيه بحر واسع
ممكن لان ماخشتناش ثقافة البيوتيكـ،، فلو كل بنت اتخش تشري اتقولهم : " هادي فيها سولفات مانشريهاش، أو سيليكون، أومواد ضارة"
كانوا يضطروا ايجيبوآ المطلوب
يعني السوق احني نتحكــموآفيه مش هو يتحكم فينا
لهذا حنطلق من مدونتي حمـــلة مقاطعة
صدقت روحها البنت
:P
مجموعة البودي كير والمونيكير
العصي تدفع الجلد الزايد في الظفر وتنظفه
بـ 3 جنيه
وهادا المصحح
مقشر للمنطقة حول الظفر
CORRECTION
CUTICLE EXFOLIATING
يستعمل في البودي كير والمونيكير يقشر منطقة حول الظفر ويلمعه، فيه حليب اللوز
ANTI-BREAKAGE
NAIL TREATMENT
معالج للأظافر من التكسر
هادا شكله من الداخل
فيه زبدة الكاكاو، يغذي الأظافر و يعيد ليونة ومرونة الأظافر الجافة
سعره 12 جنيه
فراشي المكياج
SOFT BLURRED EFFECT LIGHT COVERAGE
آيشدو برش من الخاصات بالبلندنق برش
IMPROVE COMPLEXION FLAWLESS COVERAGE
سعرهم كل وحدة 15 دينار
DEODORANT
Laotian Lotus Flower Roll-On Deodorant
خديت ليا ولـــزوجي العزيز
متاعي بـزهرة اللوتس ، بينما زوجي للبشرة الحساسة بدون كحول بــخلاصة
الـ Anta bean "شوره نوع من الفول اول مرة نسمع بيه"
خالي من الألومنيوم، الباربين
لا يتركـ آثارا على الحوايج.
عجبني جداً ،،
ولو اتجــوا اتقارنوا شن جبت لروحي وشن جبتله مافيش وجه مقارنة
:p
الهدايا:
ترارااااااااااا
ايجيكـ شعور حلو لما اتجيكـ الحاجة فري،،
:)
زي ما قلتلكم اني زرت المحل على ثلاث مرات في أيام التخفيض كنت انحصل في هدايا كل مانشري حاجة
عطتني في المرة الأولى البوكـــس هادا هدية
والشنطة هادي
والشامبو هاد الجميع انواع الشعر
SUPER SOFT SHAMPOO WITH WITCH HAZEL
في المرة التانية اللي نسيت انجيب فيها الديودرانت حصلت هدية
مقشر صغير من مجموعة الحمام المغربي
في المرة الثالثة اللي ماكانش فيها تخفيض حصلت بوكس لطيف وشنطة تانية نفس الأولى عطيتها لاختي
البنات اللي ايبيعوآ في السياحية لطيفات والمحل ننصحكم بزيارته
شكرآ لــحسن استعماعكم ونتلاقوآ في تدوينة جديدة.
